Selektor Hrvatske Ivica Tucak kaže da je u finišu meča protiv Crne Gore bilo svega, ali da je njegova ekipa sama kriva što nije slavila i osvojila prvo mjesto u grupi A.

Foto: YouTube screenshot/LEN European Aquatics

Ljut je Tucak što je morao da zatraži VAR provjeru na 2:17 prije kraja, kada je Vlado Popadić laktom udario Matijasa Biljaku.

“Ne mogu da vjerujem da ljudi to ne vide, da dvojica sudija sude i da tek nakon moje intervencije, gdje ja moram da glumim ludaka, primijete očigledan udarac u glavu. Nakon toga smo promašili peterac, nismo se odmah naplatili, a naravno da je odmah išlo isključenje na suprotnoj strani, i to nakon pet sekundi. Sami smo krivi, ali da je bilo svega, bilo je”, rekao je Tucak.

O poništenom golu Đura Radovića pri rezultatu 11:11 nije rekao ni riječ.

“Žao mi je što nismo uzeli dva boda, jer bismo imali nešto lakši put. Imamo četiri slobodna dana, u četvrtfinalu smo što nam je bio glavni cilj. Ostaje žal, imali smo sve u svojim rukama – taj “brutaliti”, šanse…”, istakao je Tucak.

Crna Gora je meč dobila petercima, ali joj to nije bilo dovoljno za direktan plasman u četvrtfinale.