Najkorisniji igrač NBA lige Nikola Jokić rekao je za RTS nakon pobjede Denvera nad Minesotom da je njegov tim u trećoj utakmici plej-of serije pokazao mnogo bolju energiju i veću agresivnost, da je igrao brže i pametnije, bez mnogo izgubljenih lopti.

Foto: YouTube screenshot/House of Highlights

Košarkaši Denvera ubjedljivo su u gostima pobijedili ekipu Minesote rezultatom 117:90 i prednost Timbervulvsa u polufinalnoj seriji Zapadne konferencije NBA lige smanjili na 2:1.

“Igrali smo brže i pametnije većim dijelom utakmice. Nismo imali toliko izgubljenih lopti poslije kojih mogu lako da daju poene. Kreirali smo otvorene šuteve i pogađali. Dobro smo skakali u odbrani. Kolektivno sjajna utakmica za nas”, istakao je Jokić.

Nagetsi su prve dvije utakmice izgubili pred svojim navijačima, a sada su u Minesoti vratili jedan brejk. Nekadašnji igrač beogradske Mege kaže da je razlog bolje partije u gostima vjerovatno pritisak na domaćem parketu.

“Vidjećemo u nedjelju kako će biti. Oni su bili najbolji u ligi, skoro cijele godine su bili na prvom mjestu i nikome ne odgovaraju kao protivnik. Imaju puno raznovrsnih napada, mogu da napadaju razne igrače u raznim akcijama. Treneri rade savršen posao, mislim da ne odgovaraju nikome, pa tako ni nama”, naglasio je Jokić.