Mlada reprezentacija Crne Gore dobila je rivale u novom ciklusu kvalifikacija za EURO 2027. Žrijeb u Nionu ,,sokole“ je smjestio u grupu E, u kojoj su još Italija, Poljska, Švedska, Sjeverna Makedonija i Jermenija.

Foto: Ilustracija/Pixabay.com 

Devet pobjednika grupa i najbolja drugoplasirana selekcija direktno će se kvalifikovati na završni turnir, koji će 2027. godine igrati u Albaniji i Srbiji. Ostalih osam drugoplasiranih kroz baraž će se boriti za preostala četiri mjesta u završnici.

"Žrijebani smo u grupu sa veoma kvalitetnim protivnicima, selekcijama koje imaju istoriju nastupa na finalnim turnirima za U-21 reprezentacije i koje su u prošlosti uspjele da se okite naslovom najboljeg u Evropi za ovaj uzrast. Italija je sigurno najkvalitetnija u grupi, selekcija su koja je sastavljena od veoma kvalitetnih igrača koji u kontinuitetu nastupaju za klubove iz Serije A. Vrlo dobro znamo da su i Poljaci, sa kojima smo prethodnih godina igrali u konkurenciji U-19 reprezentacija, kvalitetna selekcija u kojoj ima odličnih igrača. Tu je i Švedska koja iz godine u godinu ima dobru U-21 selekciju i koja će, sigurno, biti veoma zahtjevan i težak protivnik. Očekuju nas i dueli sa selekcijama Sjeverne Makedonije i Jermenije koji će, makar teorijski, biti najlakši za naš tim u ovom ciklusu. Očekuje nas deset jakih i interesantnih duela u ovim kvalifikacijama i svakom od njih pristupićemo maksimalno odgovorno i posvećeno. Prije žrijeba, a i nakon što smo saznali ko su nam protivnici u narednom ciklusu kvalifikacija, kao primarni cilj definisali smo da budemo bodovno i pozicijom na tabeli bolji u odnosu na prethodne cikluse, dok ćemo iz drugog plana tražiti svoju šansu da napravimo rezultat koji bi se karakterisao kao veliki uspjeh", kazao je selektor Goran Perišić.

Novi ciklus kvalifikacija počeće u martu ove i završiće se u oktobru 2026. godine. Konačan raspored kvalifikacija biće objavljen naknadno.

Raspored grupa

Grupa A: Španija, Rumunija, Finska, Kosovo, Kipar, San Marino

Grupa B: Portugal, Češka, Bugarska, Škotska, Azerbejdžan, Gibraltar

Grupa C: Francuska, Švajcarska, Island, Farska Ostrva, Luksemburg, Estonija

Grupa D: Engleska, Republika Irska, Slovačka, Moldavija, Kazahstan, Andora

Grupa E: Italija, Poljska, Švedska, Sjeverna Makedonija, CRNA GORA, Jermenija

Grupa F: Njemačka, Gruzija, Grčka, Sjeverna Irska, Letonija, Malta

Grupa G: Holandija, Norveška, Slovenija, Izrael, Bosna i Hercegovina

Grupa H: Ukrajina, Hrvatska, Mađarska, Turska, Litvanija

Grupa I: Danska, Belgija, Austrija, Vels, Bjelorusija