Nije uspio u dva meča protiv Slovenije, ali je u Prištini dočekao prvu radost u ulozi selektora Crne Gore – Vlado Šola je protiv Kosova ostvario prvu pobjedu na klupi “lavova”, a taj trijumf označio je i siguran plasman na Evropsko prvenstvo u Njemačkoj iduće godine.

Foto: Instagram screenshot/hfmontenegro

Crnogorci su protiv Kosova, u petom kvalifikacionom meču, slavili 26:24 i garantovano će biti makar jedna od četiri najbolje trećeplasiranih ekipa iz osam grupa.

Naša selekcija ni u jednom momentu nije ozbiljnije dovodila u pitanje trujumf nad posljednjeplasiranom selekcijom grupe 7, ali je pokazala slabosti koje mora što prije da otkloni.

– Igrali smo u grču, to se vidjelo. Dođemo na četiri, pet razlike i kad treba da ,,slomimo“ utakmicu, da pogodimo zicer ili povučemo kontru, sve to smo odrađivali u grču i te stvari moramo da promijenimo. Moramo da imamo više samopouzdanja. Igra u odbrani je bila dobra u prvom poluvremenu, na momente odlična, imali smo i veliku podršku golmana, dok smo u drugom primili mnogo golova sa sredine i uvukla se nesigurnost u napadu – kazao je Šola.

,,Lavovima“ će u nedjelju protiv BiH biti dovoljan bod za ovjeru drugog mjesta i bolju poziciju na žrijebu za EP.

– Cilj je ispunjen, ali moramo pobijediti Bosnu i Hercegovnu zbog rejtinga i samopouzdanja. A i publika koja će doći zaslužuje da jojuzvratimo pobjedom. Volio bih da odigramo taj meč s manje grča i vjerujem da će tako biti – istakao je Šola.